De Ovend – feberwaori 2019
Foto's Lenus van der Broek

Et vul beslist niet mit veur de jury van et Stellingwarfs Meziekfestival om te bepaolen wat et beste Stellingwarver lied van 2018 wodden gong. Mar nao lang overleg mit mekeer kwammen ze d'r tóch uut: 'Schreeuw' van de fermaosie 'Dawn of day' uut West-Stellingwarf, mit zangeres Mirjam Postma (woonplaetse De Hoeve).

De jury vun dit et beste lied, omreden tekst en meziek goed bi'j mekaander passen, butendat sprak de prissentaosie ok slim an. Mar de jury hadde ok veur alle ere vuuf lieties hiel veul wardering. Zo was d'r ok ommeraek veul wardering veur et Stellingwarver lied 'Neem mi'j mit' van de gitaarklub Capodastro's. Een uutschieter naor beneden zat d'r neffens de jury beslist niet bi'j.

Mooie verscheidenhied an dielnemers
Dit keer was d'r opni'j een mooie verscheidenhied an meziek. Jong en wat oolder, ze deden allemaole mit, en ok dat gegeven maekt dat et Stellingwarfs Meziekfestival uniek is. De zang- en meziekgroep DoVo (Deur oolderen Voor oolderen) uut Buil kreeg n.a.v. heur prachtige optreden mitien al vraoge naar optredens. Et festival was dit keer in de hierveur slim geschikte zael bi'j de Rustende Jaeger in Hooltpae. Rond de 130 bezukers zorgden mit mekeer veur een genoeglike en feestelike Stellingwarver aovend. Behalven de winner van de wedstried deden an et festival mit: the Lion Rules, de Scheve Schaatsband, SOTD, de Capodastr's en DoVo. De jury beston dit keer uut Emma Winter, Appie van Riesen en Wim Hunneman (juryveurzitter).

Lekaole omroep Odrie
De prissentaosie was, op heur bekende enthousiaste wieze, in hanen van Anna Span.Veur de geluudsverzorging zorgde Janko Blaauw van Jubbege. Et festival wodde opneumen deur de lekaole omroep Odrie, en die opnaemen bin een schoffien leden uutzunnen. De orgeniserende warkgroep van de Stellingwarver Schrieversronte - bestaande uut Kjest Herder, Piet Tjassing, Klaasje Herder en Sietske Bloemhoff - is van doel en hooi et festival ankem jaar opni'j, mar dan op 16 november, bi'j de Rustende Jaeger. De eerste dielnemers gavven heur daar al mitien veur op.

Dawn of day/ Suze Sanders

Schreeuw

Ok al stot jow wereld in
Blief ondaanks in jezels geleuven
Zuuk je greens op en vertrouw
Op de kracht die schoeit in jow

Waacht op mi'j, pas op mi'j
Laat mi'j los, vertrouw op mi'j

De lacht is koold en vol mit aangst
De kaemer vuult die oolde sfeer
't Vuur is uut mar 't rokt nog steeds
Naar de liefde die oons dreef

Waacht op mi'j, pas op mi'j
Laat mi'j los, vertrouw op mi'j

Laat op straote de laampen oons goed beschienen
En an de overkaant 'n stoepe vol mit bliede meensken
Schrief mien naeme dan in 't locht van jow verwaachtings
Nanananananana

Waacht op mi'j, pas op mi'j
Laat mi'j los, vertrouw op mi'j

Laat op straote de laampen oons goed beschienen
En an de overkaant 'n stoepe vol mit bliede meensen
Schrief mien naeme dan in 't locht van jow verwaachtings
Nanananananana

De Hoevense zangeres Mirjam Postma